Tabletat Ponstan përmbajnë acid mefenamik i cili është një medikament i grupit anti-inflamator jo-steroid (NSAID).

Indikohet nëse keni:
– simptoma të inflamacionit, të tilla si skuqje dhe enjtje;
– dhimbje dhe parehati të shkaktuara nga artriti, çrregullime muskulare ose reumatike;
– dhimbje koke, dhimbje muskulare ose dhimbje dhëmbi;
– dhimbje pas operacioneve, traumave;
– dhimbje të lindjes;
– perioda të dhimbshme ose të rënda.

Mos merrni Ponstan:
– nëse jeni alergjik ndaj acidit mefenamik, ndaj ndonjë medikamenti tjetër të grupit anti-inflamator josteroid (siç është aspirina, ibuprofeni, celekoksibi) ose nga ndonjëri prej përbërësve të tjerë të këtij formulimi;
– nëse keni ose keni pasur ndonjëherë sëmundje të stomakut ose zorrëve si ulçera peptike, gjakderdhje në stomak ose gastrit të rëndë;
– nëse keni një sëmundje inflamatore të zorrëve (p.sh. koliti ulceroz, sëmundja e Crohn);
– nëse keni probleme të rënda të zemrës, mëlçisë ose veshkave;
– nëse sapo keni bërë operacion bypass në zemër;
– nëse jeni shtatzënë më shumë se 6 muajsh;

Ponstani dhe alkooli
Mos konsumoni alkool në të njëjtën kohë me ponstan, pasi mund të shtohet rreziku për hemorragji në stomak.

Shtatzënia, ushqyerja me gji dhe fertiliteti
Nëse jeni shtatzënë ose ushqeni me gji, mendoni se mund të jeni shtatzënë ose po planifikoni të keni një fëmijë, pyesni mjekun tuaj përpara se të merrni këtë medikament.

Shtatzënia
Nuk ka studime që tregojnë ndikimin që mund të ketë marrja e acidit mefenamik gjatë 6 muajve të parë të shtatzënisë, tek fetusi. Vetëm mjeku mund ta gjykojë nëse është e nevojshme marrja e tyre apo jo.
MOS i merrni tabletat në 3 muajt e fundit të shtatzënisë, pasi ato mund të ndikojnë negativisht në proçesin e lindjes. Ato gjithashtu mund të rrisin gjasat e gjakderdhjes tek nëna dhe tek foshnja.

Ushqyerja me gji
Acidi mefenamik kalon në qumështin e gjirit dhe mund të ndikojë tek fëmija. Ju nuk duhet t’i merrni tabletat gjatë ushqyerjes me gji, përveç rasteve kur këshillohet nga mjeku juaj.

Fertiliteti
MOS i merrni tabletat nëse po përpiqeni të mbeteni shtatzënë, pasi ato mund ta bëjnë më të vështirë të mbeteni shtatzënë. Ju duhet të informoni mjekun tuaj nëse planifikoni të mbeteni shtatzënë ose nëse keni probleme me shtatzëninë.

Përpara përdorimit të këtij medikamenti lexoni me kujdes fletëudhëzuesin e pranishëm në paketim, pasi ai përmban një informacion më të detajuar.
Për çdo paqartësi këshillohuni me mjekun ose farmacistin tuaj.